May 16, 2025, ki subah main Haridwar pahuncha tha, Amritsar se mera plan tha Gangotri jaane ka. Wahan ke liye main bus dhoondh raha tha, but bus stand se early morning buses nahi mili kyuki saari buses subah hi nikal jaati hain. Main lagbhag 8 AM tak pahuncha tha.
Uske baad, maine bahar private buses dekhi jo Chardham Yatra ke alag-alag destinations pe jaa rahi thi. Par Gangotri aur Yamunotri ke liye yahan se direct buses nahi milti. Haan, raaste mein aane wale spots jaise Chamba aur Uttarkashi ke liye private buses available thi, but unko chalne mein bahut time lagta hai kyuki woh poori bharne ke baad hi nikalti hain.
Uttarakhand Roadways: My Ride to Uttarkashi
Itne mein hi, mujhe Uttarakhand State Government ki ek sarkari bus mil gayi, jo Uttarkashi tak jaane wali thi. Uttarkashi se Gangotri ka distance 100 km hai. Main iss bus mein baith gaya, jiska kiraya ₹450 tha.
Haridwar se Uttarkashi ke liye bus time pe chal padi aur various places par rukti hui ja rahi thi, kyunki use local passengers ko pick-up aur drop karna hota hai. Bus kaafi acchi thi, seats bhi comfortable thi.
Rishikesh: The Gateway to Chardham Yatra
Kuch hi time mein hum Rishikesh pahunch gaye. Yahan se aap samne purana bus stand dekh sakte ho, jahan se Chardham Yatra ke liye buses advance booking ke saath milti hain. Aur saath hi, naya wala bus stand bhi hai, jahan hamari bus करीब 10 minutes ruki aur kuch additional passengers ko onboard kiya.
Chardham Yatra Registration: Your Essential Permit
Agar aapne apni Chardham Yatra registration nahi karwai hai, toh yeh karwana bahut zaroori hai. Maine is par ek detailed video banaya hai jise dekh kar aap online registration karwa sakte hain.
Agar aap Rishikesh se Chardham ke liye jaana chahte hain, toh bus stand ke paas hi ek registration counter hai. Yahan aakar aap register karwa sakte hain. Yeh registration bahut mandatory hai, kyunki raaste mein aapko rok kar check kiya jata hai.
Scenic Route: Narendra Nagar & Chamba
Bus Rishikesh se nikal kar Narendra Nagar aur phir Chamba ke route se aage badhi. Thodi der chalne ke baad, hum Chamba pahunch gaye. Yeh Chamba Himachal wala nahi, Uttarakhand mein bhi ek Chamba naam ka town hai, jo dekhne mein kaafi khoobsurat hai.
Yahan bhi bus thodi der rukti hai, kyunki yahan se kaafi passengers board aur deboard hote hain. Chamba shahar ka nazaara bahut hi sundar hai aur yeh acchi location par situated hai. Yahan ka temperature Haridwar aur Rishikesh se kaafi alag aur pleasant tha.
Neeche garmi thi, but Chamba pahunchte hi mausam ne dil jeet liya. Yahan ke ghar bhi kitni sundar jagah par bane hain aur yahan aakar ek acchi vibe aati hai. Yahan aap floating huts bhi dekh sakte hain.
Nearing Uttarkashi: Last Leg of the Bus Journey
Ek jagah par bus ruki jahan se Uttarkashi ka distance 20 km reh gaya tha aur Gangotri 120 km. Raste mein main so gaya tha aur kaafi places miss kar di. Jo jo main apne camera mein capture kar paya, woh yahan share kar raha hoon.
Door se Uttarkashi shahar kitna sundar dikh raha hai, ek valley ke beech mein bana hua hai, dono taraf pahad hain aur beech mein yeh shahar. Yeh Bhagirathi Nadi ke kinare basa hua hai.
Uttarkashi: A Night's Stay and Further Journey
Uttarkashi mein bus aapki yatra rok deti hai. Mujhe aage jaane ke liye bus ya koi aur option nahi mila, toh main Birla Dharamshala mein ruk gaya. Yahan mujhe ₹600 mein ek bahut hi accha room mil gaya. Uttarkashi mein ghumne ke liye places jaise Mandir bhi hain, unka video bhi main alag se banaunga.
Uttarkashi to Gangotri: Shared Taxi Experience
Next day, main thoda aage chal kar gaya toh wahan se shared taxis mil jaati hain, jaise Mahindra Bolero. Yeh taxi union ka stand hai jahan se aap Gangotri ke liye aage jaa sakte hain.
Mujhe ek Mahindra Bolero mili, jiska charge ₹300 per person tha. Yeh gaadi tabhi chalti hai jab 10 passengers poore ho jaate hain. Hamari gaadi mein sirf 5 log the aur log kam se kam 2 ghante se wait kar rahe the.
Shared Taxi Challenges & Solutions
Yahan se aapko alag-alag jagahon ke liye shared taxis mil jaati hain: Batwari, Srinagar, Rishikesh aur bhi kai destinations. Gangotri ka kiraya ₹300 hai. Jaisa ki maine bataya, hamari Mahindra Bolero bhar nahi rahi thi, sirf 5-6 log hi the. Toh maine driver se baat kari ki hum sab milke kiraya cover kar lete hain. Tab jaakar gaadi aage nikal payi.
Agar aap yahan aate ho, toh ho sakta hai aapko iss situation ka saamna karna pade. Aapki gaadi time par na chale. Jaisa ki maine bataya, hum sabne milkar kiraya pay kiya aur phir yeh 5-6 log Mahindra Bolero se aage badhe.
Mandatory Registration Checkpoint
Raaste mein ek checkpoint par apki registration check hoti hai. Har ek passenger ki registration check ki jaati hai aur jiske paas registration hoti hai, wahi aage jaa sakta hai. Toh yeh bahut zaroori hai ki aap Chardham registration pehle se hi karwa lein.
Maine video banaya hua hai, jaisa ki pehle bataya, woh aap dekh lena, bahut easy process hai. Agar online nahi kar sakte, toh offline bhi Rishikesh aur Haridwar mein kar sakte hain. Har gaadi ko yahan se hote hue hi aage jaana hai.
Bhagirathi River & Harsil Valley
Beech mein Uttarkashi ka dam hai, jahan se Bhagirathi Nadi ka pani channelized kiya gaya hai. Maine video mein dikhaya hai ki kitne flow se pani aa raha tha. Yeh Bhagirathi Ganga ka pani hai.
Aage chalte hue Harsil Valley aati hai, jo Uttarakhand ki sabse khoobsurat jagah hai. Iske liye maine alag se ek video banaya hai, kyunki jab maine yatra complete kar li thi, tab wapas aate hue main yahan ek din ke liye ruka tha.
Yeh bahut hi sundar place hai, iska video bhi aap mere channel pe dekhna.
Approaching Gangotri: The Final Stretch
Raaste mein aapko multiple beautiful bridges milte hain. Yahan se Gangotri ab sirf 8 km reh gaya tha. Bhairon Ghati se just 1 km peechhe hamari gaadi ruk gayi thi, kyunki Uttarkashi ke locals apni dukaane aage bana ke baithe hue hain aur apna saaman mangwa lete hain.
Toh iss gaadi mein kuch saaman unka aaya tha. Yahan drop karne ke liye gaadi 10 minutes ke liye ruki thi.
Welcome to Gangotri Dham!
Finally, Uttarkashi se 3-4 ghante mein hum Gangotri pahunch gaye. Raaste mein kuch traffic jam bhi laga hua tha, is wajah se thoda time lag gaya. Taxi stand mein aakar hamari Mahindra Bolero ruk gayi aur driver ne saaman utar kar de diya.
Yahan se aage badhte hue aapko is gate se hote hue jaana hai. Yahan se mandir ka rasta 1 km ke kareeb hai, shayad usse bhi kam. Yahan aapko har tarah ka saaman mil jaata hai, khaane-peene se lekar kapdon tak.
Gangotri Market & Amenities
Raaste mein jab aap chalte ho, toh aapko ek board milega jahan se aapko various places ke baare mein pata chalega jahan aap aage jaa sakte hain: Gaumukh, Bhojwasa, Chirbasa. Yeh trekking hai jiske liye permission lagti hai.
Permission ke bina aap aage nahi jaa sakte. Maine sirf Gangotri tak ka hi safar kiya tha, iske aage main nahi gaya, kyunki iske liye permission nikalni padti hai aur mere paas utna saaman bhi nahi tha.
Gangotri tak ka hi yeh safar tha, uske baad main Harsil aur baaki jagahon pe gaya tha. Filhaal aap dekhiye, yeh rasta proper interlock tiles se bana hai, jahan aap aaram se chal kar aage jaa sakte hain. Hotels aur multiple shops aapko yahan dikh jaayengi.
Kisi bhi tarah ka saaman chahiye, woh easily available ho jaata hai. Maine yahan se khaane ke liye jaise 1 kg aata, chai patti aur aisi hi alag-alag cheezein bhi li jo easily mil gayi, kyunki mere paas cooking ke liye saaman pada hua tha. Toh maine aaram se jahan room liya tha, wahan jaakar cooking bhi kar li thi. Har tarah ka saaman aapko yahan mil jaayega.
Wheelchair Services & Locker Facilities
Yahan aap wheelchairs bhi dekh sakte hain mere video mein. Yeh unke liye hain jo walk karke nahi jaa sakte. Iska kiraya gate se, jahan taxi stand hai, wahan se lekar wapsi tak ₹400 hai. Matlab poora round trip yahan se lekar mandir, mandir se wapas. ₹400 mein wheelchair par aap aage jaa sakte hain aur wapas aakar darshan kar sakte hain.
Iske alawa, agar aapke paas kuch saaman hai jo aap store karna chahte hain, toh uske liye aapko clock rooms bhi yahan mil jaate hain. Wahan aap apna saaman rakh kar aaram se darshan kar sakte hain. Main yahan Gangotri mein do din ruka tha aur jahan main ruka tha, uska video alag se banaya hai, kyunki woh ek separate video hai aur aapke liye helpful ho sakta hai agar aap Gangotri aana chahte hain.
Gangotri Weather & Accommodation
Gangotri ka temperature lagbhag 7-8 degrees Celsius tha, matlab thand hai. Apne thande kapde zaroor lekar aana. Main toh lekar gaya tha, is wajah se mujhe koi dikkat nahi hui. Din mein dhoop rehti hai, beech-beech mein baarish ka mahol ban jaata hai, lekin mausam bahut hi accha hai yahan. Do din main yahan ruka, dono din mujhe bahut sundar mausam mila.
Iske alawa, aapko har jagah ashram bhi dikhenge, Ganga Ji ke is taraf bhi aur dusri taraf bhi. Lekin jo dusri taraf hai, wahan kuch zyada ashram hain. Is taraf thoda zyada commercialization hai, lekin dusri taraf itni commercialization nahi hai.
Aur unhi mein se ek ashram hai jahan main ruka tha, aur main use totally recommend karta hoon. Aap bhi wahi ruke. Uske liye ek separate video main bana raha hoon, jaisa ki pehle bataya, woh video mein aap dekh lena. Bahut hi easily aur acche dhang se aap wahan reh paayenge. Do din main Ganga mein ruka aur mujhe toh bahut hi accha aur comfortable stay laga.
Essential Services at Gangotri
Dekhiye, medical facilities bhi hain yahan. Agar kisi ko kisi bhi tarah ki zaroorat ho, toh sab tarah ka saaman aapko mil jaayega. Agar kapde nahi laaye, bhool gaye ho garmi ke kapde jo chahiye hote hain aapko, toh yahan se kapde bhi aap khareed sakte ho.
Aap dekh sakte ho ki Gangotri mein itna rush nahi hai. In fact, mujhe bhi zyada se zyada ek ghanta laga hoga darshan karne mein. Pichli baar bahut rush ho gaya tha Yamunotri-Gangotri mein, is baar aisa kuch nahi tha.
Path to Gangotri Temple & Ghat
Yeh samne aap rasta dekh sakte ho jo mukya mandir ki taraf jaa raha hai, aur neeche jo hai woh Ghat ki taraf rasta hai. Aapne left side mein jaana hai aur seedha aage jaakar phir aap mandir pahunch jaayenge. Yahan se mandir ka distance maatra 100 se 150 meters hai.
Aur har jagah dukaane hain, khaane-peene ki ya saaman lene ki. Agar aap kuch lekar jaana chahte ho wapas, prasad wagerah ki, sab kuch yahan aapko aasani se mil jaata hai.
The Serene Walk to the Temple
Maine is video ko isliye raw rakha hai, kyunki main kuch badha chada ke nahi batana chahta tha aapko aur na hi maine kuch ismein zyada editing ki hai. Toh aap yeh dekh sakte ho, jo rasta hai woh as it is chal ke jaa raha hoon main, taaki aapko yeh na lage ki maine kuch tezi se aapko dikha diya aur bata diya.
Bas yeh bahut chota sa ek rasta hai, kareeban 1 km ka yeh track hai. Track bhi kya hai, simple rasta hai jismein na toh chadhai hai na utrai hai, bas ek samtal road hai jo interlocking tiles se bana hua hai, aur us par chal ke aapko bas jaana hai.
Gangotri Temple Architecture & Darshan Experience
Aur yeh samne aap dekh sakte ho mandir ka gate aa gaya hai. Bahut hi easy yeh rasta hai kisi ke liye bhi, chahe aap umardraz hain ya nahi. Toh yeh aap dekh sakte ho, sabhi tarah ke log jaa rahe hain. Lekin phir bhi agar dikkat ho, toh aap wheelchair jaise maine aapko peechhe dikhai, woh lekar aa sakte ho.
Yeh mandir ka architecture dekho, jahan se aap aage andar jaate ho. Shayad yeh Deodar ki lakdi se bana hua hai, yeh saara jo entrance ka area hai. Main thoda alag raste se mandir ke liye chala gaya tha, kyunki mujhe kisi ne bataya tha idhar se chale jao, lekin direct seedha rasta tha.
Lekin koi baat nahi, yeh bhi rasta mandir ko pahunchta tha, toh itna koi tough nahi tha. Haan, lekin jo agar main seedha jaata toh seedha bilkul paas hi tha mandir. Toh main Ghat se hote hue hi mandir ki taraf gaya tha. Yeh neeche aap dekh sakte ho Ghat ka rasta hai. Toh kisi ne mujhe thoda sa misguide kar diya tha ismein, kyunki main pehli baar hi jaa raha tha Gangotri mein.
The Holy Dip and Aarti at Gangotri Ghat
Mandir se neeche hi ek ghat hai, jahan se hi Ganga jal bhar ke aage le jaate hain. Yahan se hi Bhagirathi Nadi aati hai Gaumukh se hote hue. Toh yahin pe log snan karte hain, yahan se hi pani bhar ke lekar jaate hain.
Aur agar aapke paas saaman hai jo aap clock room mein rakhna chahte hain, toh aapko Ghat ke paas hi yeh clock rooms bhi mil jaate hain. Halaanki maine nahi rakha, kyunki mera yahan stay karne ka irada tha.
Aur yeh Ghat alag-alag bane hue hain, bahut door tak multiple Ghats hain. Yeh jo area dekh rahe ho, yeh raat ko yahin pe Ganga Aarti hoti hai. Uska bhi maine video banaya hai, jo main alag se upload karunga. Yahan se hi Ganga Aarti hoti hai raat ko.
Other Temples and Darshan Queue
Yeh samne Ganesh Mandir hai aur various other mandir hain jahan aap darshan kar sakte ho. Mandir kahan hai? Upar jaa rahe hain, upar hai. Jaisa maine aapko bataya, main thoda alag raste se gaya tha.
Toh yeh Ghat wala rasta hai, wahan se hote hue main upar jaa raha hoon mandir mein darshan karne ke liye. Yeh samne aap dekh sakte hain jo white colour ka wahi mandir hai.
ATM & GMVN Guest House in Gangotri
Jahan se line shuru ho rahi thi koi 50 meters ki doori pe hi mandir tha. Toh itni lambi lines nahi thi jaise pichli saal thi, log kaafi pareshan hue the. Is baar aisa kuch nahi tha. Line mein lage hi maine prasad bhi le liya tha yahin se.
Toh aap aage tak line mein lage prasad le sakte hain. Mere ko toh mil gaya, shayad ho sakta hai ki aap jab aaye tab wahan pe option na ho, isliye koshish karein peechhe se hi prasad le lijiye.
Line mein lage lage aap clearly dekh sakte hain mandir ka proper view, kyunki andar se video nahi bana sakte. Aap bahar bahar se hi video bana sakte hain. Toh yahi mere saath hua. Line mein lage lage jo jitna main dikha saka, woh aapko main dikha raha hoon, kyunki aage garbhagriha mein camera allowed nahi hai.
Accommodation Options Near Gangotri Temple
Mandir ke paas hi ek Punjab National Bank ka ATM bhi hai. Agar aapko ATM ki zaroorat hai, toh tension lene ki koi zaroorat nahi hai. Aapko kahin jaane ki zaroorat nahi hai, mandir ke paas hi aapko Punjab National Bank ka ATM mil jaata hai.
Iske alawa, mandir ke paas hi GMVN bhi hai, Garhwal Mandal Vikas Nigam ka Guest House. Toh wahan pe bhi aap booking karwa ke aa sakte hain agar wahan pe rukna hai aapko. Yahan Gangotri mein multiple GMVN hain. Toh ek jo GMVN hai, woh bilkul mandir ke paas hi hai. Toh usmein bhi booking kar sakte hain beforehand, yahan aane se pehle pehle.
Toh aapko mandir ke paas rukne ka mauka mil jaayega. Haan, lekin yeh jo GMVN hai, woh bahut mushkil se milte hain, kyunki pehle se hi yeh booked rehte hain. Toh agar time se book kar lenge, toh ho sakta hai aapko bhi mauka mil jaaye mandir ke bilkul paas mein rehne ka.
Main toh yahan se is Ganga Ji ke opposite side mein ruka tha, ashram mein. Uska video aap dekh sakte ho iss article mein upar diya hai. Mandir enter hone se pehle maine camera band kar diya tha, kyunki, maine padh liya tha ki garbhagriha ka photo lena sakht mana hai.
Exploring Gangotri's Beauty
Darshan karke main aa gaya bahar aur yahan maine dekha log yahan agarbatti wagerah jal rahe the. Halaanki main nahi yeh kar paya, kyunki mujhe iske baare mein maloom nahi tha. Toh yeh wapas main Ghat pe aa gaya aur Ghat ke agar aap opposite dekhenge, toh wahan pe multiple rehne ke liye places bani hui hain, ashram se lekar hotel se home stay sab kuch.
Toh main unhi mein se kisi ek mein ruka tha, jo ki sabse best option hai aur main woh aapko batane wala hoon agle video mein. Toh uske liye aap intezar karna, woh video bahut jald aane wala hai.
Yeh samne aap glaciers bhi dekh sakte hain. Valley yeh bani hai, valley mein hi yeh mandir hai. Aur yeh Bhagirathi Nadi Gaumukh se hote hue aage Devprayag mein jaakar Ganga Ji ban jaati hain jab yeh Alaknanda se mil jaati hain. Mandir dekho kitni acchi jagah pe bana hua hai.
Uske baad raat ka thoda sa video yeh maine banaya tha aur yeh kitna sundar lag raha tha mandir.
Reviewed by Pankaj Sharma
on
6/19/2025
Rating:
No comments: